Klangenan Jogja Mbiwarakaken Ngayogyakarta Aman
Klangenan jogja mbiwarakaken ngayogyakarta aman
Ngayogyakarta, www.jogjatv.tv - Biwara Ngayogyakarta aman sasampunipun kurdaning Redi Merapi, mungkasi pentas Klangenan Jogja 2010, ing Monumen Serangan Umum Satu Maret Yogyakarta, malem minggu kalawingi(27/11). Kejawi punika, kangge nyengkuyung kelompok kesenian lokal ing Ngayogyakarta, ing kalodhangan wau Pemerintah Kota Yogyakarta, masrahaken bantuwan arta pembinaan dhateng 45 kalurahan ing Kitha Ngayogyakarta.
Swasana gumbira warga perenging Redi Merapi sanalika pecah dados gugub lan tangis, nalika Redi Merapi dumadakan njeblug. Kurdaning Redi Merapi tetela damel risakipun wewengkon sakiwa tengenipun. Ing tengahing swasana gugub kasebat, wonten satunggaling tiyang ingkang kupiya damel ruwetipun swasana, awit mengku ancas mirunggan. Ananging Wakil Walikota Yogyakarta - Haryadi Suyuti kanthi dipun ampingi dening sawetawis petugas, tumuli rawuh kangge ngleremaken warga. Pentas drama kasebat dipun gelar salebeting Fragmen Kabar Ngaruwara, ingkang dipun lampahaken dening grup kesenian saking Kalurahan Notoprajan, ing plataraning Monumen Serangan Umum Satu Maret Ngayogyakarta.
Pentas drama ingkang nggambaraken kurdaning Redi Merapi punika, ugi ngiras kangge mbiwarakaken bilih kitha Ngayogyakarta aman saking kurdaning Redi Merapi. Klangenan Jogja ingkang ajeg dipun gelar ing saben wulan punika, mujudaken asiling patembayatan Dinas Pariwisata dan Kebudayaan Kota Yogyakarta kaliyan Komunitas Klangenan Jogja, kangge mitontonaken kaskaya seni budaya saking saben kalurahan ing Ngayogyakarta.
Tidak ada komentar:
Posting Komentar